Парламенцкая асамблея Арганізацыі па бяспецы і супрацоўніцтве ў Еўропе (ПА АБСЕ) апублікавала тэкст "Бялградскай дэкларацыі", у якую ўключана і рэзалюцыя па Беларусі.
Нагадаем, 20-я сесія ПА АБСЕ працавала ў Бялградзе з 6 па 10 ліпеня. Рэзалюцыя па Беларусі была ўхвалена асамблеяй 9 ліпеня, а выніковая дэкларацыя прынята ў нядзелю. Гэты дакумент утрымлівае рэкамендацыі для АБСЕ і шэрагу нацыянальных парламентаў.
"Мы спадзяёмся, што ўрад Беларусі, а таксама кіраўніцтва АБСЕ, пачуюць гэтыя рэкамендацыі, прыслухаюцца да заклікаў больш чым 230 парламентарыяў, успрымуць іх сур'ёзна і пачнуць дзейнічаць", — сказаў БелаПАН дырэктар па камунікацыях ПА АБСЕ Ніл Сайман.
Рэзалюцыя заклікае ўлады Беларусі "ўдакладніць факты, звязаныя з заявамі затрыманых, якія ўцяклі за мяжу, пра тое, што ў турмах КДБ зняволеных прыніжаюць, катуюць, і патрабуе незалежнага міжнароднага расследавання такіх абвінавачанняў".
Парламентарыі АБСЕ таксама заклікаюць афіцыйны Мінск "выконваць падрабязныя рэкамендацыі, што ўтрымліваюцца ў дакладзе АБСЕ "Маскоўскі механізм".
У рэзалюцыі ўтрымліваецца заклік вызваліць усіх затрыманых падчас дэманстрацыі 19 снежня 2010 года, "якіх варта лічыць палітычнымі зняволенымі". Калі ж не адбудзецца вызвалення, ПА АБСЕ чакае, што зняволеным хоць бы "будзе дадзены бесперашкодны доступ да прававой дапамогі, дазволена іх наведванне сваякамі, а таксама будзе забяспечвацца іх медыцынскае абслугоўванне".
Беларусь заклікаюць "цесна супрацоўнічаць з прадстаўніком АБСЕ па пытаннях свабоды СМІ для вырашэння праблем, звязаных з пагрозай закрыцця карпунктаў незалежных СМІ і распрацаваць заканадаўства аб СМІ ў духу прынцыпаў АБСЕ".
Асамблея "выказвае надзею на тое, што акты рэпрэсій у дачыненні да праваабаронцаў не паўторацца, і чакае, што ў супрацьлегласць гэтаму ўсе структуры адміністрацыі Беларусі будуць строга выконваць прынцыпы АБСЕ, пад якімі таксама падпісалася Беларусь, і канвенцый аб правах чалавека". Парламентарыі таксама спадзяюцца, "што ў будучым не будуць забараняцца мірныя дэманстрацыі і сходы".
ПА АБСЕ "заклікаюць улады спыніць праследаванне, запалохванне і рэпрэсіі ў дачыненні да членаў апазіцыйных палітычных партый у форме звальнення з працы і выключэння з універсітэтаў". Яна "выказвае шкадаванне праследаваннем няўрадавых арганізацый і заклікае да спрашчэння працэсу рэгістрацыі гэтых груп грамадзянскай супольнасці".
Парламентарыі заклікаюць органы дзяржаўнай улады Беларусі да дэмакратызацыі заканадаўства, выказваюць надзею, "што будучыя парламенцкія выбары ў Беларусі будуць праводзіцца ў адпаведнасці з дэмакратычнымі стандартамі".
ПА АБСЕ "працягвае руку" для аднаўлення дыялогу з афіцыйным Мінскам, выказвае імкненне дапамагчы Беларусі "заняць сваё месца ў дэмакратычнай і свабоднай Еўропе ва ўмовах вяршэнства закона".