Марылуізэ Бек, дэпутат бундэстага і адзін з непрымірымых праціўнікаў ўручэння "Квадрыгі" Уладзіміру Пуціну, выказалася за мадэрнізацыю "Пецярбургскага дыялога" і распавяла пра тое, што стала персонай нон-грата ў Беларусі.
У форуме "Пецярбургскі дыялог", які праходзіў з 17 па 19 ліпеня ў Вольфсбурзе і Гановеры, удзельнічала дэпутат нямецкага бундэстага ад партыі "Саюз-90"/"зялёныя" Марылуізэ Бек. Яна паслядоўна выступае за адкрытую дыскусію з Расіяй па палітычных і праваабарончых пытаннях. У інтэрв'ю "Нямецкай хвалі" Бэк заявіла, што ЕС і Расія павінны разам змагацца за дэмакратызацыю Беларусі.
- Адной з галоўных тэм цяперашняга мерапрыемства стала мадэрнізацыя. А ці мае патрэбу сам "Пецярбургскі дыялог" у мадэрнізацыі?
- Добрае пытанне. Гэта мерапрыемства з'яўляецца нядрэннай пляцоўкай для абмену думкамі і абмеркавання нязручных тэм. Хацелася б, каб удзельнікі дыскусій не абмежаваліся толькі эканамічнымі і сацыяльнымі тэмамі, а закраналі сапраўды балючыя пытанні, якія тычацца выканання правоў чалавека, свабоды СМІ і праблем грамадзянскай супольнасці. Такая мадэрнізацыя была б пажаданая для ўсіх задзейнічаных бакоў.
- У ходзе форуму не раз узнімалася пытанне аб тым, што Германія і Расія павінны сумесна займацца праблемамі Беларусі. А што вы думаеце на гэты конт?
- Так, яны павінны сумесна выступаць за дэмакратычныя пераўтварэнні ў Беларусі. Расійскі бок, які цалкам дакладна аказваў падтрымку апазіцыйным кандыдатам на прэзідэнцкіх выбарах у Беларусі і натхняў іх на барацьбу, за дзесяць дзён да выбараў у Беларусі падпісаў з Лукашэнкам 17 пагадненняў. Мяркуючы па ўсім, менавіта з гэтага моманту Масква перастала лічыць неабходнымі дэмакратычныя перамены ў Беларусі і развязала рукі Лукашэнку.
Я ўзяла шэфства над палітычным зняволеным Андрэем Саннікавым, з якім падтрымлівала кантакты на працягу многіх гадоў. Я ведаю, што дапамога яму аказвала Масква і, на мой погляд, без яе садзейнічання у Саннікава не было б ніякіх шанцаў правесці сваю перадвыбарчую кампанію. Так што гаворка ў дадзеным выпадку ідзе, можна сказаць, і аб расійскіх зняволеных. Расія мае самыя вялікія магчымасці ўплыву на Беларусь. Таму мне вельмі хацелася б, каб ЕС і Расія цесна ўзаемадзейнічалі адзін з адным у гэтым кірунку. Тады ў Лукашэнкі не застанецца прасторы для манеўру. Адным з першых патрабаванняў павінна быць неадкладнае вызваленне ўсіх палітычных зняволеных у Беларусі.
- Ці сапраўды ў вас у апошні час узнікалі праблемы з уездам у Беларусь?
- Так, у мяне ёсць беларуская віза і я хацела папрысутнічаць на судовым працэсе над Саннікавым. Але беларускі МЗС абвясціў мяне персонай нон грата.