Улады горада распавялі пра ход рэалізацыі Канцэпцыі гарадской устойлівай мабільнасці
З кожным годам Беларусь усё больш урбанізуецца, і разам з ростам гарадоў павялічваецца і мабільнасць яе жыхароў. Досвед замежных краін падказвае, што ўладам трэба клапаціцца не толькі пра камфорт для аўтамабілістаў, а будаваць сістэму ўстойлівай гарадской мабільнасці, зручную для ўсіх сацыяльных груп. Шляхі развіцця беларускіх гарадоў айчынныя і замежныя эксперты абмяркоўвалі падчас семінара "Новыя прылады інтэграванага гарадскога і транспартнага планавання», арганізаванага РГА "Беларускі саюз транспартнікаў", Рэгіянальным прадстаўніцтвам Фонда Фрыдрыха Эберта ва Ўкраіне, Еўразійскім прадстаўніцтвам Міжнароднага саюза аўтамабільнага транспарту, Праграмай падтрымкі Беларусі Федэральнага Ўрада Германіі ды ОДБ Брусель.
| Устойлівы стан гарадской мабільнасці адлюстроўвае, наколькі зручна ў ім перасоўвацца пешшу, на веласіпедзе, у грамадскім транспарце ці на асабістым аўтамабілі, а таксама наколькі гэтыя віды перасоўванняў узаемазвязаны між сабой. Гэтая сістэма мусіць быць зручнай для ўсіх, эканамічна эфектыўнай і экалагічнай. |
У Беларусі адна з першых Канцэпцый гарадской устойлівай мабільнасці была распрацаваная для Наваполацка. Дакумент з’явіўся ў 2014 годзе ў рамках праграмы падтрымкі Беларусі ўрадам Германіі.
Пра ход рэалізацыі праекта прысутным распавёў старшыня Наваполацкага гарадскога савета дэпутатаў Вячаслаў Дурноў.
 |
| Вячаслаў Дурноў, старшыня Наваполацкага гарадскога савета дэпутатаў |
"Наваполацк - адзін з самых маладых гарадоў краіны, сёлета яму спаўняецца толькі 58 гадоў. У Канцэпцыі распрацоўшчыкі ўлічылі асаблівасці горада, спецыфіку дзейнасці прамысловых прадпрыемстваў і неабходнасць стварэння санітарна-абарончай паласы. Наваполацк мае своеасаблівае дзяленне па зонах: адасобленыя жылыя і рэкрэацыйныя раёны", -- патлумачыў Вячаслаў Дурноў.
Паводле яго слоў, горад мае тры цэнтры рассялення. Гэта сам Наваполацк (102 тысяч жыхароў), гарадскі пасёлак Баравуха (5,5 тысячы) і вёска Міжрэчча з прыватнай катэджнай забудовай. Накладае адбітак і блізкасць ад Полацка. "Агульная сетка камунікацый забяспечвае не толькі транспартную сувязь паміж гарадамі, але і спрыяе выкарыстанню жыхарамі Полацка і Наваполацка тых гістарычных, адукацыйных і гандлёвых аб’ектаў, што складаюць агульную каштоўнасць", -- распавёў Дурноў.
У Канцэпцыі ў якасці асноўных арыенціраў былі вызначаныя зніжэнне негатыўнага ўплыву транспарту на здароўе людзей і навакольнае асяроддзе, паляпшэнне даступнасці гарадскіх аб’ектаў, павышэнне камфортнасці грамадскага транспарту, а таксама стварэнне ўмоў для перасоўвання пешшу ці на ровары і ўлік інтарэсаў людзей з абмежаванымі магчымасцямі перасоўвання.
Якія канкрэтныя рэкамендацыі атрымалі гарадскія ўлады для павышэння гарадской устойлівай мабільнасці?
Сярод іншага, эксперты раілі даць аўтобусам прыярытэт у часе руху па галоўных вуліцах Наваполацка, стварыць больш прывабныя ўмовы для пасажыраў трамваяў, у тым ліку абсталяваць прыпынкі лаўкамі з дахам і стэндамі з раскладам руху. Таксама сярод парадаў указваліся стварэнне веласцяжынак і паступовы перавод парковак у цэнтры горада на платную аснову.
Што з вышэйпералічанага паспелі зрабіць гарадскія ўлады за 2014-2016 гады?
"Распрацаваныя і рэалізаваныя схемы роварнага руху па цэнтральнай вуліцы Маладзёжнай. Вакзалы і дыспетчарскія станцыі абсталяваныя пандусамі, -- пералічваў Вячаслаў Дурноў. -- Усе трамваі Наваполацка абсталяваныя маўленчай інфармацыйнай сістэмай, у большасць трамваяў усталяваныя "бягучыя радкі", два трамваі абсталяваныя для перавозкі ўсіх катэгорый інвалідаў". З’явіўся ў горадзе і адзін нізкапольны трамвай.
Аўтобусны парк Наваполацка налічвае 95 МАЗаў з кнілінгам – гэта сістэма, якая дазваляе аўтобусу "нахіляцца" ў бок да прыпынку для большага камфорту пасажыраў, асабліва з абмежаванымі магчымасцямі.
Вячаслаў Дурноў запэўніў, што Наваполацк далучаецца да міжнародных "зялёных" ініцыятыў: "Традыцыйным стала правядзенне акцыі "Дзень без аўтамабіля", на працягу дня жыхарам Наваполацка і гасцям горада прапануецца адмовіцца ад перасоўвання на асабістым транспарце і аддаць перавагу грамадскаму транспарту ці веласіпеду. Праводзіцца акцыя "Бясплатны праезд". Удзельнікам акцыі прапануецца праехаць у аўтобусе і трамваі бясплатна, дастаткова паказаць тэхнічны пашпарт на аўтамабіль".
Па ягоных словах, наваполацкія ўлады адкрытыя для супрацоўніцтва і гатовыя рэалізоўваць новыя праекты.
 |
| Акцыя "Жывая вуліца" падчас Еўрапейскага тыдню мабільнасці ў Наваполацку |
|
|
| Паліна Вардэванян |
Адным з экспертаў Беларускага саюза транспартнікаў, якія складалі Канцэпцыю ўстойлівай мабільнасці Наваполацка, была Паліна Вардэванян, старэйшы выкладчык кафедры горадабування Беларускага нацыянальнага тэхнічнага ўніверсітэта.
У сваім выступе яна патлумачыла, што складанасці ў рэалізацыі амбітных праектаў узнікаюць перадусім праз недахоп грошай. "Чаму ўзнікаюць складанасці? Гэта залежыць ад людзей у кабінетах, якія адказныя за прыняцце рашэнняў. Калі пачынаецца абмеркаванне ў любым фармаце, у такіх людзей узнікае адказ: усе прапановы добрыя, але грошай няма", - удакладняе яна.
Эксперт Паліна Вардэванян раіць звяртацца да замежнага досведу і знаходзіць там гатовыя рашэнні. Яна прыводзіць прыклад бразільскага горада Курытыба, які прэтэндуе на званне самага экалагічнага ў свеце. Па планіроўцы ён надзвычай падобны да Наваполацка.
"Такія рашэнні [як у Курытыба] могуць быць па планіроўцы вуліц, па сумесным выкарыстанні аўто. Калі адкрыць ініцыятыву людзям, многія пытанні, якія, як нам здаецца, каштуюць вялікіх грошай, можна вырашаць прасцей, але дружна", - падсумоўвае эксперт.
 |
| Паліна Вардэванян, сябра БСТ старэйшы выкладчык кафедры горадабування БНТУ |
Чытайце таксама:
У Мінску прапануюць развіваць трамвай, а не будаваць развязкі
Топ-5 парад па паляпшэнні гарадской мабільнасці ў Беларусі ад брытанскага эксперта
Какие возможности финансирования для инноваций в транспортной сфере есть для Беларуси?