Трэнінг для моладзевых адукатараў (Гродна)

аўт, 2016-06-28 13:03

30-31 ліпеня 2016 года ў Гродне (Беларусь) беларускамоўны рэсурс Adukacyja.info ладзіць бясплатны трэнінг для адукатараў моладзі: выкладчыкаў універсітэтаў і коледжаў, настаўнікаў старэйшых школьных класаў, вядоўцаў нефармальных адукацыйных курсаў і супрацоўнікаў устаноў дадатковай адукацыі, моладзевых работнікаў. Вітаюцца ўдзельнікі з рэгіёнаў Беларусі - з вёсак і невялікіх гарадоў.

Тэмы трэнінгу:

  • Новыя трэнды ў адукацыі (навыкі 21-га стагоддзя, "гейміфікацыя", масавыя анлайн-курсы, "змяшаная" і "самакіруемая адукацыя", ментарства).
  • Медыяпісьменнасць ды магчымасці інтэрнэту для адукацыі.
  • Прыгожая візуалізацыя адукацыйных матэрыялаў.
  • "Outdoor"-адукацыя (адукацыя на свежым паветры).
  • Адукацыйныя магчымасці для беларускіх навучэнцаў і настаўнікаў.
  • Кансультацыі па падрыхтоўцы акадэмічных і прафесійных рэзюмэ (CV) і матывацыйных лістоў.
  • Асобны блок для настаўнікаў ангельскай мовы як замежнай: кансультацыі па асаблівасцях падрыхтоўкі да міжнародных тэстаў на веданне ангельскай мовы TOEFL і IELTS.

Вітаюцца кандыдаты, для якіх праца з моладдзю - нешта большае, чым  правесці свой занятак і развітацца з вучнямі да наступнага разу.

Трэнінг прызначаны для Вас, калі Вы:

  • імкнецеся авалодаць найноўшымі методыкамі правядзення заняткаў,
  • жадаеце даведацца больш пра існуючыя магчымасці адукацыі і стажыроўкі за мяжой ды ў Беларусі,
  • жадаеце вырашыць праблемы сваіх навучэнцаў, засвоіўшы працу з міні-праектамі,
  • хочаце завесці кантакты са сваімі калегамі з іншых куткоў краіны.

Арганізатары пакрываюць выдаткі ўдзельнікаў на дарогу да Гродна, на пражыванне ды харчаванне.
Вядоўцы трэнінгу - адукатары, трэнеры, выкладчыкі ды выпускнікі беларускіх і замежных праграм.

Набор ідзе да 5 ліпеня 2016 года. Каб запісацца, неабходна запоўніць анлайн-анкету. Пра вынікі адбору арганізатары паведамяць 10-га ліпеня. З уражаннямі ўдзельнікаў трэнінгу мінулага года можна азнаёміцца тут.

 

Паводле Adukacyja.info.