Краўд-кампанія ў падтрымку баланса моваў у дзіцячых садках

Тры беларускамоўныя сям’і – Мудрачэнкі, Касьцюкевічы і Бойкі, доўга спрабавалі аддаць дзетак у беларускамоўную групку. Паасобку. Усе варыянты такіх групак на практыцы аказваліся фармальна-беларускамоўнымі. Сем'і распачалі краўд-кампанію ў падтрымку ідэі баланса моваў у садках. Трэба закупіць кнігі і абсталяванне, каб замацаваць уласны поспех і сабраць зацікаўленых бацькоў на Стратэгічны форум, каб дапамагчы спланаваць беларускамоўнае навучанне дзетак.

Напрыканцы лета 2018 году яны сабраліся у адной фармальна-беларускамоўнай групцы 403 садка, што ў Серабранцы. Туды ходзіць 22 дзіцёнкі. Наяўнасць трох сем’яў змяніла падыход выхавацеляў і загадчыцы.  Цяпер на беларускай мове адбываецца амаль 50% адукацыйнага працэсу і камунікацыі ў групцы. Практыка – адна выхавацелька цалкам размаўляе на беларускай мове, на занятках абедзве выхавацелькі ўсе новыя словы і паняцці агучваюць на адной мове і адразу перакладаюць на іншую.

Такі расклад аказаўся прыймальным для бацькоў і пазытыўна адбіўся на ўсіх дзецях. Цалкам беларускамоўная Ядзвіга Мудрачэнка пачала лепей разумець і камунікаваць з раней цалкам расейскамоўнымі дзеткамі. Апошнія пачалі разумець сваіх беларускамоўных “аднагрупнікаў” у любой сытуацыі.

Зараз, за тры месяцы такой практыкі, дзеткі развіваюцца у абедзьвух мовах. Пры жаданні пераходзяць на беларускую ці прыгадваюць як гэта можна сказаць па-руску. Атрыманы досвед пераконвае, што баланс беларускай мовы і расейскай, з’яўляецца самым натуральным развязаннем для ўсёй дашкольнай адукацыі Беларусі.

Нашыя дзеткі будуць упэўнена камунікаваць з любым іншым беларусам. А развіццё ў дзьвух мовах з самага дзяцінства вельмі пазытыўна адаб’ецца на шырыні светапогляду і крэатыўнасці мыслення. А гэта самыя каштоўныя навыкі для чалавека ў 21 стагодздзі.

Яўген Бойка – лідар ініцыятывы
+375 44 735-75-71 (viber)

Крыніца: ulej.by